Aaj mann kiya ki sabse naraaz ho jaaun

Us thandi chanchal hawa k jhoke se,

Jisne mere kaagaz uda diye;

Us chamakti deepak ki lau se,

Jisne andhere k sukoon ko cheer diya;

Mere bachpan ki pyaari si gudiya se,

Jisne mujhe bade ho jaane ka ehsaas karaa diya;

Mere ladakpan k us suhaane gaaane se,

Jisne kuchch sapno ko fir se yaad dila diya;

Maa ki pyaari si thapki se,

Jisne ab zimmedaar hone ka samay dikha diya;

Papa k us laad se,

Jisne mujhe fir se bachchi ho janey ko lalchaa diya;

Yaaron ki us tasveer se,

Jisne mujhe sachcha yaaranaa dikhaa diya;

Doston ki us hansi se,

Jisne unse milne ko tadpaa diya;

Ghar par rakkhey us paudhey se,

Jisne phoolon ka intezaar karaa diya;

Rasoi k choolhe se,

Jisne tumhaare liye banaayi roti ko tha jalaa diya;

Sheeshe mein meri parchhai se,

Jisne mere sajne ko fizool bataa diya;

Darwaaze ki ghanti se,

Jisne tumhaare na aane ka sach dikha diya;

Man kiya ki aaj sabse naraaz ho jaaun,

Sab se lad jaaun, Sab se rooth jaaun;

Na hansu, na gaaun,

Thoda ro loon, thoda chillau;

Aaj us jhoothi muskaan ko bhool jaaun,

Man kiya ki aaj sabse naraaz ho jaaun.